اليوم وغدا: إنتفاضة الشارع المصري مستمرة من اجل غزة
مش عارفة ليه من ساعة ما عملت المدونة ديه والدنيا والعة وكل يومين مظاهرة ,مش عارفة أكتب ولا موضوع حر أو عام .كل ما أقول هعمل موضوع عن كذا تطلع لي إيشي مظاهرة أسعار وإيشي مظاهرات بوش وده كله كوم وحصار غزة كوم تاني,فأبقى مضطرة إني أغطي الخبر وأجل كل المواضيع العامة
على أي حال,اللي حصل في مظاهرات النهاردة حاجة لا يمكن تتفوت وما ينفعش تحصل وماحكيش عليها,بصراحة وفي البداية أنا مارحتش لكن صوت المظاهرة كان واصلني بشكل مستمر على التليفون المحمول وبجد يا جماعة حسيت إن السماعة هتنفجر من علو الصوت وحماس الناس وهي بتهتف.الهتاف اللي رن في ودني أوي كان بيقول(واحد إتنين00الجيش المصري فين) ,فقلت لنفسي صحيح؟!هو الجيش المصري فين؟!وبعدين قلت يمكن مشغول ولا حاجة بلاش نظلم الناس.بعد كده سمعت صوت ااااااااااااااه والخط إتقطع فعرفت طبعا إللي فيها وقلت ربنا يستر وتيجي على قد الإصابات ,لكن طبعا ده ماحصلش وعرفت إن في إعتقالات كتيرررررررررررإللي يقول خمسمية وإللي يقول ألف وإللي يقول ألفين المهم إنهم كتيررررررررر
على فكرة يا جماعة بكرة كمان في مظاهرة تانية لدعم غزة والمناداة برفع الحصار عنها ياريت الكل
يحضر ويشارك ولو بالهتاف وأعتقد إنه أضعف الإيمان
في ميدان التحرير -الساعة السادسة
دول شوية صور لمظاهرات النهاردة
الأمن يغلق ميدات التحرير وشوارع وسط البلد
الأمن يغلق ميدات التحرير وشوارع وسط البلد
وصول ما تبقى من المتظاهريين إلى نقابة المحاميين
4 comments:
كعادة الإعلام المصرى القذر , و بعد نجاح الإخوة فى غزة فى إقتحام معبر رفح , تم الإعلان عن السماح بفتح المعبر بتوجيهات من السيد شيخ المنصر حسنى مبارك
فى الوقت الذى يتم فيه قمع المتاظهرين من أجل غزة
لا حول ولا قوة الا بالله !
الغريبة يا جميز إنه كذب الكذبة وصدق نفسه
والله يااخواننا مافتح المعبر الا سلاح الدعاء اللى ناس كتير كانت متهاونة بيه وبتقول لنا انتو كل شويه تقولوا الدعاء الدعاء بس واله الذى لا اله غيره هو الدعاء النابع من قلوب صادقة متوكله على الله ليست متواكله قلوب مؤمنة بأن الجهاد فرض عين بس مش بإيدها حاجة غير انها تصوم وتدعى وحسبنا الله ونعم الوكيل نعم المولى ونعم النصير
انا معك يا دكتور محمد الدعاء والتقرب إلى الله اهم العوامل لنجاحنا في كل شئ لكني أعتقد أن الدعاء يجب أن يكون مقترن بالفعل أيضا ولا إيه؟
Post a Comment